A FIRMA CONTRACT OFICIAL CU SEPB.

OAA ta inicia september proximo.

ORANJESTAD: Dialuna mainta Minister Endy Croes a firma e contract oficial entre Ministerio di Enseñansa y Deporte hunto cu e directiva di SEPB. Presente na e ocasion special aki tabata directora di SEPB, miembronan di directiva y director di EPB Oranjestad. E contract ta encera cu Openbare Avondleergangen Aruba (OAA) ta cuminsa den luna di september proximo y lo haci uzo di e facilidadnan di EPB na HATO. Minister Endy Croes a indica cu den futuro OAA lo cuminsa na San Nicolas tambe.

Sr. Carlos Martines ta e persona encarga pa pone OAA bek riba pia den un bachi completamente nobo. E mandatario di Enseñansa a indica di ta hopi contento cu pronto OAA tin su luga. Esaki ta brinda e hobennan di 17 aña te adulto e oportunidad pa nan prepara nan mes cu curso y estudionan pa asina por integra hopi mas miho prepara den e mercado laboral.

Por ultimo e mandatario ta gradici directora di stichting SEPB, sra. Diahnne Lejuez, director di EPB Oranjestad, sr. Erwin Lopez pa nan colaboracion como tambe na sr. Carlos Martines cu ta ranca e proyecto aki pa nos por a yega asina leu y ohala cu esaki ta e inicio di un OAA exitoso pa futuro. Enseñansa ta e yabi pa futuro.

• 

• 

• 

• 

•