Cu tres gol di Ricky Hodge, Dakota ta elimina Britannia for di Copa Betico 2022.

Un Dakota cu den e minuut nan inicial a sali na domina e partido contra di Britannia por completo. E prome 25 minuut nan tur cos tabata Dakota cu a lansa un serie di atake dilanti di e gol di Britannia. Portero Carlos Geerman y su linea di defensa comanda pa Dubero sigur tabata tin hopi trabou na man di e atacantenan Ricky, Shemar y Sebastian. Es mas hopi duelo individual tambe a ser gana pa esnan di Dakota. Britannia tabata purba cu a bala largo buscanso Linscheer padilanti pero aki e defensa comanda pa Robert y Paul no a duna mucho espacio pa sorpresa. Poco poco Britannia a cuminsa drenta e partido ora cu Dakota a baha den e ritmo di wega y aki Linscheer tabata na dos ocasion peligroso.

GOLNAN Dakota ya ta bay ariba den e marcador na di 9 minuut, ora cu e defensa Resef Gross ta anota den un rebound. Resef ta haya e bala riba su pia y facilmente ta lob esaki over di e cabes di e defensanan di Britannia. Aki portero Calucho Geerman ta tapa e bala riba un tiro, pero no por a wanta esaki cu tur consecuencia. Mester bisa cu un rato e prome e bolante di Dakota, Daniel Briceno ta haya un gol morto pa hinka ora e ta kita portero Geerman pero asina mes ta tarda pa skop e bala den gol y ta perde e oportunidad. Na di 39 minuut, alero Ricky Hodge ta tira lastra net na rand di e area penal y aki e bala ta dal den un pia di e defensa di Britannia y drenta gol pa e 2 - 0. Mester bisa cu e gol a cay na un momento cu Britannia a mustra di a drenta completo den e wega bek. Un rato despues den pito, riba un bon hugada di Sebastian Montoya, cu ta buta un paso lastra pa Ricky Hodge esaki ta tira duro riba gol y aki portero Geerman no por a wanta e bala cu ta pasa bou di su curpa y drenta gol pa e 3 - 0.

DOS TEMPO Na e inicio di e di dos tempo nos a mira un wega basta pareu,. Dakota a mustra conforme cu e ventaha riba Britannia. Pero na e 53 minuut, riba un perdida di bala di un defensor di Britannia, Ricky Hodge no ta pordona y ta anota su di tres gol di e anochi pa e 4 - 0. Despues di e gol, Britannia a sigui purba cu dos bon atake riba gol pero sin e resultado desea. Un di dos tempo unda e ritmo a baha por completo, Dakota a keda wanta e wega bon apesar di tur e esfuerzo di Britannia cu a purba te final. Dakota a haya varios chens mas pero tabata slordig den nan acabada nan. Mucho mas no a pasa den e wega cu Dakota logrando e semi final cu un victoria convincente riba Britannia. Cortesia di : #297sports