top of page
719463365_122105819763347262_2403659605112174386_n.jpg

DVG ta alerta riba uso iresponsabel di medicina pa baha peso

Mar 24
2 min read

ORANJESTAD, Aruba –24 maart 2026 Directie Volksgezondheid (DVG) ta alerta comunidad riba uso cada bes mas frecuente y peligroso di medicamentonan pa baha peso manera Ozempic, Mounjaro, Wegovy y otro producto di e grupo GLP-1.


Den su rol pa promove salud general y preveni malesanan, DVG a tuma nota di un alerta epidemiologico emiti pa Organizacion Panamericana di Salud (PAHO/WHO) tocante uso indebido di e tipo di medicamentonan aki .


E medicamentonan aki ta wordo desaroya principalmente pa trata diabetes tipo 2 y den algun caso specifico, obesidad cu complicacionnan medico. Sin embargo, nan uso mester tuma lugar exclusivamente bou supervision medico y cu prescripcion di un doctor, basa riba evaluacion individual di cada pashent .


DVG ta preocupa cu:

• E medicamentonan ta wordo usa sin prescripcion, puramente pa baha peso

• Tin aumento den compra via canalnan no oficial, manera online of importacion ilegal


Segun PAHO/WHO, e uso incorecto por causa efecto secundario serio, manera:

• Inflamacion di pancreas (pancreatitis)

• Probleman cu vesicula biliar

• Bloqueo di tripa

• Complicacionnan adicional cu ainda ta den investigacion


Compra di e medicacionan aki via canalnan no oficial (ilegal) ta aumenta e riesgo cu e producto por ta falso, contamina of no a wordo warda den condicionnan corecto, poniendo bo salud y bo bida na peligro .


DVG ta haci un yamado na comunidad

• No usa medicacion pa baha peso sin conseho medico

• No cumpra producto via canal informal of online (ilegal)

• Consulta semper cu un profesional di salud prome cu usa cualkier tipo di medicina.

DVG lo sigui monitorea e situacion y ta haci un yamado na comunidad pa tuma decisionnan bon informa, conciente y responsabel ora trata di nan salud.


Bo Salud nos Prioridad


Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, of Follow nos den WhatsApp Channel, subi nos website www.dvg.aw, yama nos na 5224200 of mail nos na servicio@dvg.aw



 
 
 

Comments


6880f4fe-538e-4e85-81b1-be0fc7d490f1.jpeg
IMG_8711.png
bottom of page