E CANTANTE A CANSA DI MIRA SU MAMA PASA TRABOU Y A BISTI BIKINI CU SU MAMA TA BREI PA YUDE HAYA CLIENTE.

BRASIL — Den un birada sorpresivo cu ta resalta e poder di social media y e amor di un yiu pa su mama, e cantante brasilero Thiago Pantaleão a uza su plataforma digital pa transforma e hobby di brei di su mama, Bianca, den un gran logro pa su carera hunto cu e empresa gigante di moda, Vogue.

Pantaleão tin un gran cantidad di siguidonan di mas cu 380,000 riba Instagram y a dicidi di tuma accion ora el a mira con su mama tabata lucha financieramente. Apesar di traha oranan largo limpiando oficina na Paracambi, Brasil, Bianca tabata brei bikini di crochet cu hopi pasion, pero casi ningun hende tabata cumpra nan. Mientras tanto, marcanan comercial tabata bende e mesun diseño aki pa rond di 400 Real brasilero, pero Bianca no tabata haya ni 40 Real.

Determina pa mustra e talento scondi di su mama, Pantaleão a bisti un di e bikininan di crochet colorido cu diseño di flor cu su mama a traha, y a publica e potretnan riba internet cu e texto: "Yo luciaré su talento" ("Lo mi luci su talento").

E reaccion tabata instantaneo y masivo. E post a bira viral, provocando un ola di pedido for di diferente pais, artistanan interesa den su diseñonan, y finalmente esaki a hala atencion di Vogue. Demostrando e gran impacto di un bon campaña di marketing digital, representantenan di e revista di moda prestigioso a tuma contacto directamente cu Bianca pa ofrece trabou.