ELMAR ta felicita tur ganador y agrupacionnan di Festival Cantica di Caya 2026

Jul 28
2 min read

Oranjestad, Aruba – 28 di juli 2026 – Pa segundo aña consecutivo, ELMAR ta orguyoso di participa como patrocinador oficial di Festival Cantica di Caya, un iniciativa cultural organisa pa Fundacion Chico Harms como parti di e Temporada di Dia di Brazil 2026.

E festival a tuma luga riba 25 di juli na Centro di Bario Brazil, caminda publico por a disfruta di musica crioyo, talento local y nos ritmonan tradicional.

Masha pabien na e ganadornan di e diferente categorianan:

Categoria Tambu: Roosje Growell, acompaña pa Grupo di Tambu Zona Cultura, cu e cantica “Mi ta los awe”.

Categoria Tipico Tradicional: Jurainy Luckert, acompaña pa Rincon Boyz, cu e cantica “Ban dilanti”.

Categoria Banda Folklorico: Jason Kelly, acompaña pa Awari, cu e cantica “Ta caya a yama”.

Festival Cantica di Caya ta un iniciativa cu tin como meta pa engrandece nos movemento folklorico-cultural y crea un plataforma pa cantante, compositor, areglista y agrupacion presenta musica crioyo nobo.

E canticanan mester ta completamente nobo, skirbi y canta na Papiamento, y refleha nos cultura, folklore, tradicion, identidad y e ambiente di e celebracionnan di Dia di Brazil. Ritmonan permiti den e competencia ta Tambu, Tumba, Danza y Mazurka.

E canticanan ganador lo forma parti di e paradanan folklorico-cultural di Dia di Brazil, contribuyendo asina na preservacion y promocion di nos herencia musical.

ELMAR ta felicita tur ganador y ta gradici Fundacion Chico Harms, e organisadornan, huradonan, participantenan, cantantenan, compositornan, areglistanan y agrupacionnan cu a contribui na un edicion yen di cultura, musica y talento local. Danki pa brasa nos cultura.

Nos ta desea henter Aruba un Temporada di Dia di Brazil dushi, sano y sigur. “Sinti E Energia” di nos cultura!