Famia: Lealtad no ta algo cu bo ta hereda, sino algo cu bo tin cu gana?

E idea tradicional cu “famia ta bin prome, maske kico pasa” ta wordo seriamente cuestiona ultimamente. Den e mundo moderno, sanger ta djis un coincidencia di DNA, pero ta e accionnan y e lealtad di un persona ta determina ken realmente ta bo famia.

Pa hopi tempo a biba bou di e presion social di tin cu pordona traicion, envidia y maltrato djis pasobra e ta bin di un persona cu tin e mesun fam. Tin famia ta asta tapa cosnan cu porta primo, omo etc a hasi cu nan propio yuinan of sernan keri pa evita berguensa den famia.

Sinembargo, e tendencia nobo aki ta argumenta cu e "lazo di sanger" hopi biaha ta wordo uza como un mascara pa sconde actonan cu a pasa cu ta castigabel pa ley of comportacionnan toxico cu ta destrui e salud mental di e individuo.

E Mito di "Sanger ta mas diki cu Awa"

Lealtad no ta algo cu bo ta hereda, sino algo cu bo tin cu gana. “Nos ta biba den un epoca unda hopi hende ta haya mas apoyo, respet y amor di un amigo of un colega, cu di nan propio Famia.

Si un pariente no ta respeta bo of no ta aporta positivamente na bo bida, e no tin derecho di reclama un luga den bo curason basa riba un stamboom,”.

Un ehempel un Tata of un Mama cu nunca tawata presente, nunca a aporta den nada pero na grandi kier busca bo drechi. Ta keda na e persona si e kier crea un relacion cu e Tata of e Mama of e ta lage for di su bida pa semper. Y ningun hende tin derecho di husga su desicion mirando cu esey ta su desicion y esey ta su Paz.

Un persona cu ta traiciona y of a hasi bo daño, no por uza e excusa di 'nos ta famia' pa pidi sorry sin cambia su accionnan."

Cuanto hende a wanta abuso di su propio famia y pa berguensa pa e famia ta mantene tur cos secreto. Bo por purba sconde e acto pero bo no por sconde di locual cu e persona(famia) a hasi y sin lubida e efecto cu esaki tin ariba e victima pa semper. Cu tempo e por biba cune.. pero e lo considera e tipo di famia aki su famia? Hende cu ta supose di yude alfinal pa berguensa ta prefera bira lomba pa e realidad. Esey ta un Famia?

Blog aki ta inspira abase di hopi storianan.