FLIP FLOP FESTIVAL 2026 TA EXPANDE PA DOS ANOCHI: DREAD MAR I OFICIALMENTE PA DIABIERNA ANOCHI
Flip Flop Festival 2026 oficialmente ta birando mas grandi ainda. E organisadonan, Chill Beer y
Elite Empire Entertainment, a confirma cu e edicion di e aña aki lo tuma luga durante dos
anochi — diabierna, 5 di juni, y diasabra, 6 di juni, 2026 — na Harbour Arena Aruba.
E anuncio importante aki ta bin hunto cu e confirmacion cu e artista internacional di reggae
fusion Argentino, Dread Mar I, lo ta e headline pa e celebracion di diabierna anochi, cu a wordo
añadi recientemente.
Conoci como un di e bosnan mas influyente den e mundo di Latin reggae, Dread Mar I a
construi un base di fanatico enorme rond di Latino America, Caribe, Europa y Estados Unidos.
E artista Argentino a alcansa fama internacional danki na su mescla unico di reggae roots,
letranan romantico y influencianan urbano Latino. Den transcurso di e añanan, el a acumula
cientos di miyones di streams y views cu exitonan mundial, entre nan:
• Tu Señora
• Así Fue
• Hoja en Blanco
• Perdóname
• Nada
• Amor de Lejos
Dread Mar I ta reconoci pa brinda presentacionnan bibo y yen di energia, cu ta uni amantenan
di reggae y fanaticonan di musica Latino, loke ta hacie un di e artistanan mas pidi pa e escena
musical di Aruba den e ultimo añanan.
E organisadonan a enfatisa cu fanatico no mester cumpra un carchi adicional pa asisti na e
evento di diabierna anochi. Tur carchi cu a cumpra caba pa Flip Flop Festival 2026
automaticamente ta duna acceso na ambos anochi di e festival.
E organisadonan di e festival tambe a clarifica varios actualisacion logistico importante:
• Diabierna anochi lo tin solamente General Admission y Standing VIP.
• No lo tin mesa VIP disponibel diabierna.
Personanan cu a cumpra mesa VIP pa diasabra anochi lo ricibi automaticamente acceso
Standing VIP pa diabierna anochi.
Durante e proceso oficial di intercambio di banchi na Will Call, e assistente lo ricibi su banchi
(1) cual ta lag’e drenta tanto diabierna, 5 di juni como diasabra, 6 di juni.
Diasabra anochi, 6 di juni, lo continua cu e lineup internacional anuncia anteriormente, cu e
‘superstar’ global di reggaeton, Myke Towers y e icono di soca Machel Montano.Myke Towers actualmente ta situa entre e nombernan mas grandi den musica urbano Latino
mundialmente, cu mas di 38 miyon oyente mensual riba Spotify y multiple colaboracion
internacional y exitonan cu a yega na top di e listanan di exito. Mientrastanto, Machel Montano
ta sigui domina e escena mundial di soca cu su presentacionnan energetico, hunto cu su
banda bibo, bailarinnan y su produccion di gira mundial
E festival tambe lo sigui destaca talento local y Caribense fuerte cu presentacion di:
• Tsunami
• Groove Masters
• I-Culture
• DJ-nan y artistanan local durante henter e fin di siman.
E organisadonan tambe a confirma cu mas banda , dj local y sorpresanan pa diabierna anochi
lo wordo anuncia pronto. E organisacion local di musica electronico Spacy Island lo percura pa
e area di musica electronico den e ‘Bacardi Area’.
Flip Flop Festival a evoluciona den transcurso di e añanan di un evento di entretenimento local
pa bira un di e festivalnan di musica mas grandi y reconoci di Aruba, atrayendo bishitante di
henter Caribe, Latino America, Miami, Corsou y mas leu. E organisadonan ta spera miles di
asistente un biaha mas pa e edicion di 2026.
Carchinan actualmente ta disponibel via:
• Pay.aw
• Citgo Boulevard
• Citgo Essoville
E organisadonan tambe a confirma cu benta di carchi a drenta oficialmente den di dos rond y e
prijsnan lo sigui subi segun e festival ta acerca. Ta anima fanatico pa sigura nan carchi lo mas
pronto posibel.
Informacion tocante mesa VIP ta disponibel via WhatsApp na +297 569-3005.
Flip Flop Festival 2026 ta un presentacion di Chill Beer y Elite Empire Entertainmen
Comments