Hopi expectativa pa Juan Luis Guerra na Aruba dia 13 di december proximo!

Despues di hopi speculacion, diaranson atardi den e ‘presidential suite’ The Ritz Carton Hotel Aruba a duna e anuncio oficial cu Juan Luis Guerra y su 440 lo ta na Aruba pa un concierto. Esaki lo tuma luga na Harbor Arena diasabra dia 13 di december durante un anochi magico cu yama ‘ A night in Paradise.’

Cu presencia di varios miembro di prensa y partner, a comparti e noticia cu pueblo di Aruba, Caribe y mundo completo. Elite Productions / Empire ta esunnan encarga cu e produccion di e evento aki cu ta priminti di kibra tur record. Juan Luis Guerra y 440 mes tin 8 aña sin bishita nos isla. E artista ta conoci pa tin fanatico den tur generacion. Esaki ta haci cu lo por conta cu miles di persona di Aruba pero tambe di exterior. E mercadeo pa e evento lo concentra su mes den nos region, Latino America y Florida. E idea ta pa fanaticonan por disfruta di nos isla su ofertanan culinario, aventurero, cultura y naturalmente disfruta di nan artista Juan Luis Guerra.

Krish Mahtani di Elite Productions y Elite Empire a comparti cu e no tabata algo facil pa por logra e concierto aki. E hecho tras di esaki ta cu e artista no ta haciendo hopi concierto mas. Ta algun fecha pa aña e mes ta scoge cu e ta aproba. Aruba pues ta hopi fortuna cu el a dicidi cu e kier presenta na Aruba. Tambe e ta hopi gradici na tur partner cu ta dunando apoyo pasobra sin nan e no lo ta posibel.

Minister di Turismo mr. Wendrick Cicilia tambe tabata presente mirando cu Gobierno di Aruba tambe ta para tras di e evento aki. Cu presencia di Juan Luis Guerra na nos isla e ta un forma unico pa duna un extra atencion na nos isla por medio di e promocion tanto prome, durante y despues di e concierto aki. Naturalmente pa Aruba Tourism Authority esaki tambe ta un oportunidad unico pa sigui pone Aruba riba mapa. Ivelisse Simon di Aruba Tourism Authority a comparti cu nan ta hopi entusiasma pa forma parti di e proyecto aki y cu nan lo ta trahando hunto cu e organisadonan pa por atrae e biaheronan pa experiencia e concierto aki.

Otro partner di e concierto manera Aruba Airport Authority, Setar NV/Pay.aw, Tropical Bottling Company, The Ritz Carlton Hotel Aruba tambe tabata presenta pa splica nan envolvimento den e proyecto grandi aki pa cera aña 2025.

E ticket- y mesanan pa e evento ta disponibel caba via Pay.aw y tambe e website www.eliteempire.events. Den transcurso di otro siman lo tin ticket fisico tambe na Citgo Boulevad, Citgo Essoville na Aruba. Na Corsou lo tin ticket disponibel na Ticket Point Zeelandia. E seccionnan ta dividi den general, standing vip, mesa di 10 persona y mesa di 6 persona. P’e mesanan por tuma contacto cu 5693005 via whatsapp. Aki lo por haya e mapa. The Ritz Carlton Hotel lo ta regalando un mesa completo entre e personanan cu bira miembro di nan programa Marriott Bonvoy. Pa participa mester registra via https://qrcodes.pro/sKml9N.

Mark-Benson Denz di Elite Productions a comparti cu otro siman lo anuncia e evento aki tambe pa e mercado internacional na Merca den presencia di diferente invitado y famoso. Tambe lo por spera den un otro anuncia e bandanan local y tambe oferta culinario cu lo ta na un nivel hopi eleva pa cumpli cu e objectivo di brinda un evento di calidad nunca bisto na Aruba.

Un danki na tur e partnernan cu ta hasi e evento aki posibel ATA, AAA, The Ritz Carlton Aruba, Setar NV y Pay.aw, Tropical Bottling Company, The St Regis Hotel Aruba, Renaissance Wind Creek Aruba Resort & Casino, Kini Kini yFirst Class Aruba.