NA COLOMBIA: SI BO DEBE ALIMENTACION, BO NO POR STROBA BO YIU MENOR DI EDAD DI BIAHA FOR DI E PAIS CU E OTRO MAYOR

Mientrastanto cu hopi famia ta planeando nan biahenan pa e temporada aki, un regla nobo na Colombia ta trece un cambio grandi den e ekilibrio entre autoridad di mayor y e bienestar di e menor. E medida aki, tin un impacto directo riba e permiso cu antes tabata rekeri di tur dos mayor pa un menor por sali for di e pais.

Detayenan di e Ley

Contrario na loke hopi hende ta kere, esaki no ta un ley cu a caba di nace. E medida ta basa riba e Ley 2097 di 2021, cual a establece e Registro de Deudores Alimentarios Morosos (REDAM).

E puntonan mas importante cu mester tene cuenta cu ne ta:

• Eliminacion di permiso: E ley ta kita e derecho di e mayornan cu ta wordo considera "irresponsabel" pa motibo cu nan no ta paga nan "alimentacion". E mayornan aki no por nenga mas pa e menor sali for di e pais.

• Aplicacion mas streng: Apesar e ley ta den vigor desde 2021, su impacto real ta wordo sinti hopi mas fuerte e aña aki, 2026.

• Rol di Migracion: Autoridadnan di Migracion Colombia a cuminsa aplica e norma aki di un forma hopi mas streng pa asina garantisa e derechonan di e muchanan.

Consecuencia pa e biahero

E cambio aki nifica un alivio pa e mayornan cu ta cumpli, ya cu si e otro mayor ta registra den e systema di REDAM pa falta di pago, e no tin e poder legal mas pa stroba e menor di biaha pa exterior. Esaki ta un paso pa pone e bienestar di e menor prome cu tur cos.