Seleccion nacional di futbol femenino a biaha pa e Concacaf Women's World Cup Qualifying round

Mescos cu a seleccion nacional masculino nos seleccion di damas no por hunga na cas debi na e situacion di stadion no apto y pesey mes mester a hunga su weganan pafor di Aruba. Diaranzon merdia, nos seleccion a biaha pa Santo Domingo, Republica Dominicana unda nan lo hunga dos wega di clasificacion di CONCACAF. Nacional di Damas. Mester bisa cu e seleccion tin basta luna ta entrena pa nan compromisonan. E seleccion nacional femenino ta forma pa hungadornan cu ta biba na Aruba y algun biba den exterior manera Belgica, Hulanda y Merca.

E prome wega di Aruba lo ta diasabra awor 19 di Februari unda nos seleccion lo enfrenta El Salvador mientras diamars benidero dia 22 di Februari, Aruba lo hunga nan di dos compromiso contra di Barbados. Aruba lo hunga su dos otro weganan di clasificacion den luna di April pa ser exacto 6 di April contra di Belize mientras tres dia despues riba e fecha 9 di April, Aruba lo enfrenta Panama. No ta conoci unda ambos wega lo wordo hunga pero e indicacion ta fuerte cu esaki lo ta na Belize.

Na airport, e directiva di AVB, famia, amigo y conocirnan a bin desea e hungadornan tur clase di exito. Prome cu nos damanan a drenta e sala di salida, sr. Pedro Krozendijk a hasi un bunita oracion pa asina tur cos bay bon cu henter nos delegacion.

Relato di #297Sports Facebook Page