Ta Tempo Pa Mayor Tuma Control Bek

Opninion Personal: Den hopi cas, mayornan ta lucha pa diciplina nan yiu. E mundo a cambia hopi, y hopi mayor ta sinti cu nan a perde control.

Awor nos ta mira hibennan sali na edad hopi yong, bai fiesta sin limite di ora, sin supervison, y algun biaha sin niun responsabilidad. Tin mayornan cu ta cansa despues di trabou, cu no tin energia pa papia, of cu simpelmente no sa con pa pone limite sin crea conflicto grandi. Pero e pregunta importante ta: ken ta guia e cas?

Riba un barco tin solamente un Capitan. Mescos cu den un cas. E mayor mester ta e persona cu ta pone direccion, limite y disciplina. E hoben no por carga e responsabilidad aki, pasobra nan ainda ta siñando, creciendo y buscando nan mesun caminda.

Ora Mucha Tuma Control

Un di e problema mas grandi cu nos ta mira awe, ta cu den algun cas e rol a bira contrario. E mucha ta dicidí ora nan ta sali, cu ken nan ta anda, con laat nan ta yega cas, y hopi biaha nan no ta mustra respet pa regla di cas. Hopi hende ta pensa cu linertad ta laga un mucha hasi loke e kier, pero libertad sin guia por bira confusion.

Respet ta cuminsa na cas.

Si un mucha no siña respet na cas, con nan lo respeta sociedad?

E Sistema Tambe A Cambia

E sistema moderno a kita algun autoridad for di mayornan. Algun biaha mayor tin miedo pa disciplina nan yui pasobra nan no kier wordo husga, critica of mal interpreta.

Pero disciplina no ta maltrato. Disciplina ta amor cu direccion. Ta enseñansa, responsabilidad y consecuencia.

Un hoben mester sa:

• cu regla tin motibo

• cu accion tin consecuencia

• cu respet no ta opcional

  
  

Tuma control bek no kiermen grita, bati of duna miedo. E kiermen ta presente. Ta consistente. Pone limite cla y mantene nan.

Mayor mester por bisa: “No, pasobra ami ta bo mayor y mi kier loke ta mihor pa bo.”

Muchanan mester amor, pero tambe estructura.

Conseho na mayornan:

Si bo sinti cu bo a perde control, sa cu bo no ta e unico. Hopi mayor ta den e mesun situacion.

Pero semper tin tempo pa cambia direccion.

Cuminsa cu stapnan chikito:

• pone ora cla pa yega cas

• sa cu ken bo yui ta anda

• no laga tecnologia domina den cas (pone limite)

• mantene regla consistente

• papia cu bo yui, pero tambe scucha

  
  

Un cas fuerte ta cuminsa cu un mayor fuerte.

No perfecto. Pero presente.