30th Ronde van Aruba - MSK Savaneta lo ta awe diabierna: All the best na tur participante

E dia memorabel pa hopi a yega. E diabierna anochi pa diasabra mainta aki lo bay ta uno cu hopi lo corda mirando cu sea den grupo, duo of individual lo core e recorido di 72km rond di Aruba. Mas cu claro pa e support team y e mirones nan tambe esaki lo keda graba. Sin duda e Ronde van Aruba a bira un di e atraccion deportivo principal di henter nos calendario di deporte. Ronde van Aruba ta keda un evento cu hopi a prepara nan mes lunas nan largo y den un solo dia tur coredor lo kier 'briya' riba caminda. E "kick" di Ronde van Aruba ta unico, di core oranan largo bunita uniforma pa e ambiente unico den pick-up of jeep, e fanaticada grandisimo bandi caminda ta apoya cu musica, sin lubida e yegada na Kazerne crusando e finish cu ta dunabo 'kippenvel' ya cubo a logra un hazaña pabo mes. Notable ta cu e mayoria cu drenta e emocionnan ta bisto, algun cu awa na wowo, claro sigur si esaki a hiba un sacrificio unico cune. Pa e debutante e sentimento lo ta unico mientras pa esnan cu a participa varios biaha caba e ta keda great. Manera un participante di añas a comenta na nos: "cada biaha e aventura di 6 pa 8ora riba caminda lo ta otro. Bo no sa nunca kiko pa expect, semper tin sorpresa".

Un palabra di pabien for di awor caba y hopi exito na tur participante den grupo/duo/individual. Cu Nos Creador compaña y ilumina cada un di boso riba caminda.

Na nos automobilistanan PLEASE ban ta cauteloso riba caminda. Baha y apoya nos participantenan manera un bon cuidadano.

BAN CELEBRA E RONDE VAN ARUBA

Nos a usa un potret spectacular di e tiro di salida efectua pa ex-Gobernador di Aruba, sr. Freddis Refunjol na 2016.

#297sports