Bishita di nos delegacion na e Museo del Deporte Santafesino

Diamars atardi probechando di un rato liber, e delegacion di Aruba a hasi un bishita na e museo di deporte di e provencia Santa Fe, ubica na e ciudad di Rosario, Argentina. Un museo relativamente nobo cu a wordo inaugura 7 di September di aña 2019 cu apoyo di e Intendencia municipal di Rosario, hunto cu e Gobierno di Santa Fe.

E obhetivo di e museo aki ta pa duna e merecido homenahe na e atletanan di e provincia di Santa Fe cu a hasi historia pa e pais Argentina den e diferente disciplinanan di deporte mundialmente. E museo ta uno impresionante cu hopi tecnologia moderno. E tin recursonan escenico, audiovisual, tecnologia y instalacionnan interactivo cu ta compone den cohunto un serie di momentonan emocionante y unico. E tecnica di exhibicion ta inclui mapping proyeccion 3D, holografia, escena di realidad virtual, multiple combinacionnan di efecto escenico, y presentacion audiovisual proyecta riba pantaya LED.

Nos delegacion sin duda a keda impresiona cu e tecnologia moderno di e museo pero mas cu tur cos, e cantidad grandi di atletanan di taya mundial cu a nace y crece den e provincia di Santa Fe cu a logra asina hopi pa e pais Argentina. E atleta mas conoci sin duda ta e estreya di futbol mundial, Lionel Messi cu por cierto a biba ni 500 meter di e museo nobo aki. Ta bon pa bisa acerca cu e propio director di e museo, sr. Juan Echeverria, a duna nos delegacion e recorido den e museo.

Na final, sra. Nicole Hoevertsz den nomber di e delegacion a otorga na sr. Echeverria un bunita flenel di "I Love Aruba" como muestra di aprecio pa brinda nos hobennan e oportunidad pa mira momentonan asina inolvidabel cu sigur lo sirbi como motivacion pa nan sigui presta den nan deporte y representa Aruba dignamente.

Por ultimo e delegacion a pasa y admira e cas unda Lionel Messi a crece como hoben den e bario di Rosario. #297sports