Bubali Damas Youth a batisa nan uniform nobo.

Diamars 8 di maart, riba Dia Internacional di Hende Muher, Bubali Damas Youth a batisa nan uniform nobo. Coach Josie Maduro a habri e anochi agradeciendo tur presente y a conta un tiki con e la cuminsa den Bubali y su soño pa cu team di damas cu despues di un temporada tabata ausente e aña aki a logra pa tin un categoria youth y asina hasi su soño realidad. Bubali a duna un bon prestacion durante e campeonato di youth tras lomba. Josie a gradici e directiva cu a dune e oportunidad di por a lanta e team femenino. Awor Josie su staff ta consisti di 4 damas cu ta yude esta su persona mes, Joanne Maduro, Mylenne de Graaf y Clarivel Angels.

Na e bautiso presente por a aprecia tur e futbolistanan infantil femenino cu ta hungando den U5 y U7, cual Josie a enfatisa cu a nan ta e futuronan di Bubali damas, aunke su deseo ta pa por tin e adultonan tambe. E madrina di e bautiso tabata Joanne Maduro cu na su lugar tambe conta un tiki di dje y compromete su mes cu e team di e damas. E uniform tabata un idea di e staff conhuntamente cu e hungadornan.

Bubali Damas Youth kier a yama un danki na Novo sport/Pedriño de Sousa cu hasi e uniform un realidad. Tambe na Elliotis restaurant, Shoko Snack, Cathalina Construction, Caribbean Bingo, Superfood, directiva di Bubali pa e cooperacion. Por ultimo na e mayornan cu ta permiti nan yui forma parti di e equipo Y alavez nan fotografo personal Carlos. #297sports