Bubali ta vence RCA den partido amistoso den U13.

E futbolistanan di Feyenoord, Aiden Kuyt y Jayroy Aparicio hunto cu nan companeronan di Bubali y RCA a brinda e publico dialuna anochi na tereno di Franklyn Bareno un tremendo spectaculo di futbol. Un cantidad grandi di fanaticada di futbol a bin presencia e duelo aki, unda ambos hoben a demostra un bon nivel di futbol. Dado momento Bubali ta bay 3 – 0 ariba den e marcador pero den e di dos tempo RCA ta bini bon bek anotando dos gol pa corta e ventaha na 3 – 2. Pero Bubali a bini bek y anota nan di 4 gol pa asina seya e victoria. E golnan di RCA a bini di Raygon Mackintosh y Jayroy Aparicio, mientras esnan cu a anota pa Bubali ta Jevin Carrasquilla, Jlyon Ras, un autogol y Endrickson Sabino.

Nos kier a duna un palabra di pabien na tur cu e bini cu e bunita iniciativa aki pa asina nos por mira Jayroy Aparicio hunga na Aruba y claro sin lubida e yiunan di e legendario futbolista Hulandes, Dirk Kuyt cu ki ora e bini Aruba e ta laga su yiunan hunga cu Bubali. No por keda sin menciona tur e otro futbolistanan di Bubali y RCA cu den nos wowonan tin un bon nivel di futbol. #297sports