Campeonato 2022-2023 di AVB dedica na 4 baluarte.

Manera ta custumber di tur aña, Arubaanse Voetbal Bond ta dedica e Campeonato na personanan cu a duna un aporte na e futbol aki na Aruba sea como hungador, referee of dirigente. E aña aki ta dedica e Campeonato na 4 persona cu sigur merece e reconocemento aki: Sr. Antonio “Tony” Geerman, Sr. Harold “Roy” Helder, Sr. Reynold “Nolly” Becker y Sr. Heinrich “Jerry” Mackay.

Sr. Reynold “Nolly” Becker

Sr. Reynold Becker, miho conoci como Nolly Becker a cuminsa hunga den e ekipo di R.C.A. na un edad hopi jong.

For di 1968 te cu 1987, Sr. Nolly a hunga como defensa pa R.C.A. Cu e club aki el a titula 4 biaha campeon y 5 biaha subcampeon di nos isla.

Sr. Nolly a participa den 7 Copa Antiano y na 1977 a titula subcampeon di Antias cu R.C.A.

Na maart 1969 el a hunga na Corsou pa e seleccion hubenil di Aruba contra Corsou y Boneiro y na juli di e mesun aña aki el a gana medaya di oro cu e seleccion hubenil di Antias Hulandes den e Weganan di Reino cu a tuma luga na Surinam.

Na mei 1970 el a bolbe forma parti di e seleccion hubenil di Aruba cu a hunga na Boneiro.

Na comienso di aña 70, Sr. Nolly a bai Hulanda unda ela completa su CIOS Opleiding. Despues di finalisa su estudio el a regresa Aruba y a sigui milita den e ekipo di R.C.A.

Na juni 1976 el a haci su debut pa e seleccion di Aruba contra Boneiro pa mira cua isla lo traha e seleccion Antiano.

Na juli 1976 Sr. Nolly a hunga pa e seleccion di Antias Hulandes contra e seleccion hubenil di Costa Rica.

Na juli/augustus 1976 el hunga pa e seleccion Antiano contra Haiti den e weganan eliminatorio pa e Mundial Argentina 1978.

Na juni/juli 1978 Sr. Nolly a hunga pa e seleccion Antiano den e Copa Duvalier organisa pa Caribbean Football Union.

Na mei 1979 e tawata den e seleccion di Antias Hulandes cu a hunga contra Trinidad weganan eliminatorio pa e Weganan Olimpico di Moscu 1980.

Na 1981 e tawata den e seleccion di Aruba cu a hunga contra Millonarios di Bogota.

Na 1986 Sr. Nolly Becker a forma parti di e ekipo di R.C.A. cu a conkista e prome titulo di campeon di Aruba, despues di Aruba su Status Aparte.

Na 1987 R.C.A. lo ripiti e hazaña y titula Campeon un biaha mas.

Sr. Nolly Becker a traha tambe como comentarista di futbol na Telearuba, unda a team up cu Sr. Roy Helder pa transmision di varios weganan final di Aruba su Campeonato.

Tambe Sr. Nolly a forma parti di e Comision Tecnico di Comite Olimpico Arubano. Y Sr. Nolly a hunga un rol importante den formacion di locual awendia ta CEMEDAR, cu a cuminsa prome como Instituto Medicina di Deporte, despues a bira e Comision Medico, for di cual Sr. Nolly a forma parti como Masahista.