Diasabra benidero den e gran final di futbol femenino lo ta Britannia 1 vs Britannia 2.

Un final di futbol femenino Copa Aruba Bank 8x8 Liga Oro entre e Lady Puma nan di Piedra Plat E ekiponan di Britannia 1 y Britannia 2 a percura pa diasabra benidero den e gran final di futbol femenino 8x8 Liga Oro bira un celebracion entre nan mes. Sin duda nos lo bay presencia un spectaculo di futbol entre e mihor hungador di futbol femenino di e mesun organisacion na Aruba. Dialuna anochi den e weganan semi-final ni RCA, ni Riverplate por a percura pa un sorpresa. Den e wega di Britannia 2 contra di RCA e gol trempan anota pa Joraine Wester Maduro di Britannia 2 a shock e ekipo tricolor cu a purba todo por todo buscando e empate. Dado momento RCA a pone hopi presion pero e defensa di Britannia tabata solido mientras e keeper di Britannia a luci tras di algun bon tiro. Tabata Mylene Croes cu ta manda Britannia ariba 2 - 0 y aki tur cos a mustra scirbi. E delantero di RCAIzaline Angela ta corta e ventaha na 2 - 1 pero mucho mas no por a wordo hasi ya cu referee a pita e pitaso final cu Britannia 2 logrando nan paso pa final. Mester bisa cu durante e campeonato regular RCA a gana Britannia 2 pero e biaha aki nan no por a logra vence e Lady Pumanan. E otro semi-final a bay entre Riverplate y Britannia 1. Sin duda un tremendo partido di futbol cu sigur den prome instante por a bay ambos banda mirando cu Riverplate sigur den e prome tempo ningun rato a mustra menos cu Britannia 1. Ambos ekipo a haya chens pa anota gol pero no a logra den e prome tempo. Den e di dos tempo, Britannia 1 a cuminsa na aumenta e presion riba e linea di defensa di River cu un Doornkamp y Flanegin peligroso padilanti. Dado momento e keeper di River a saca algun bala milagrosamente for di su gol. Tabata casi na final ora cu e delantero Daryenne Flanegin ta anota e 1 - 0 pa Britannia 1 pa asina sigura e paso. Den pito e estelar di Britannia 1, Tarianna Doornkamp cu un tiro di leu ta bati e portero di River pa asina duna Britannia 1 e paso pa e gran final contra di nan ekipo ruman Britannia 2. Na final nos por a mira un celebracion di e Lady Pumanan di Piedra Plat. #297sports