Fundeshi di nos Status Aparte

….De principiële erkenning van het recht der volken van het Koninkrijk,

hun verhouding met Nederland en onderling zelfstandig mede te regelen ligt opgesloten, of juister

gezegd, is uitgangspunt van de Koninklijke rede van 6 december 1942….

(Shon A Eman na entrega di e mocion 18 di maart 1948)

E lucha pa nos Status Aparte a cuminsa na inicio di siglo pasa ora cu Henny Eman sr. a

cuminsa haci e pueblo di Aruba conciente di un situacion cu no tabata husto. E gobierno di

Corsou tabata dicidi pa Aruba cu mester a acudi cerca dje pa cualkier cos chikito. Aruba bou

guia di e comerciante Henny Eman a cuminsa boga pa un separacion di Corsou pero cu

lasonan estrecho cu Hulanda, un Status Aparte. Su grito pa Separacion a haya oido den tur

skina na Aruba. Ora cu e refineria Lago y e waf – ambos a bin dor di intermediacion di Henny

Eman – a establece nan mes na Aruba y a trece prosperidad pa e isla, e gritonan pa

separacion a bira mas duro. Shon Henny Eman –manera e tabata wordo yama- a organisa

demonstracionnan grandi bou e lema Vox PopuIi Vox Dei. E bos di Pueblo mester a wordo

scucha. Na 1942 e bosnan aki a cruza frontera y Reina Wilhelmina, kende a priminti e islanan

cu despues di guera lo cambia e relacionnan colonial y lo bin un Reino nobo. Reina

Wilhelmina a pasa su corona pa su yiu Reina Juliana na 1948. Pa por logra e anhelo di e

pueblo, esta un Status Aparte, partido AVP a wordo funda e tempo ey. Su pasion Henny

Eman sr. a pasa over pa su yiunan y na 1941 e hoben hurista Shon A Eman a haci su entrada

den politica. Entre september 1947 y januari 1948 tata y yiu hunto cu Aristide Wever a

organisa 42 encuentro den club y casnan di hende pa asina colecta firma di hombernan

Arubiano riba 21 aña pa entrega na Su Mahestad pa asina por cumpli cu e ferviente anhelo

di e pueblo humilde aki. Den un tempo dificil na unda e infrastructura tabata laga di desea a

logra haya 2147 firma. E firmanan aki a wordo entrega na La Reina y a forma e base di e

mocion di 18 di maart 1948 ora Shon A Eman a haci entrega di mocion Eman na e

miembronan di Mesa Rondo na Den Haag. Un mocion cu unanimante a wordo acepta.

E realisacion di nos Status Aparte ta trabou di generacionnan di lidernan grandi, kendenan a

logra mobilisa nos pueblo pa e causa aki. E historia di Status Aaprte ta tambe e historia di e

progreso social-economico y di e emancipacion di Aruba y henter e pueblo cu a duna un man

pa promove e causa aki, entre nan 2147 Arubiano cu a firma e peticion pa La Reina pa Aruba

haya su Status Aparte.

Mayoria di e firmantenan aki ya no ta cu nos mas, pero nan nomber a keda graba den nos

memoria y riba Plaza 18 di maart. 2147 homber Arubiano balente cu hunto cu lidernan

visionario a pone e fundeshi cu awe nos ta baas den nos mes cas. E aña aki nos ta recorda cu

75 aña pasa e mocion di 18 di maart a keda entrega na Mesa Rondo na Den Haag. A dura casi

40 aña prome cu e anhelo di e pueblo a keda realisa dia 1 di januari 1986. Un logro di pueblo

di Aruba, guia pa lidernan visionario. Nieto di Henny Eman sr y yiu di Shon A Eman, Henny

Eman tabata e prome Prome Minister di pais Aruba.

Fundacion 18 di maart ta invita henter pueblo di Aruba y principalmente e firmantenan mes,

nan yiunan, nietonan, bisanietonan, tataranietonan y nan demas famia pa un bunita

celebracion riba Plaza 18 di maart for di 9or di mainta te 10.30.