POST ARUBA: Ban evita un multa indesea

Nos empleadonan cu ta parti carta, constantemente ta encontra nan mes den situacionnan peligroso pa motibo di cacho riba caya.

Hopi biaha nan ta wordo ataca pa cacho, cual sa resulta den accident of cu nan ta wordo mordi.

Esaki ta un situacion cu no ta solamente e ta afecta nos empleadonan di Post Aruba, pero tambe otro personanan cu ta haci deporte, cana den bario, e motociclistanan y coredornan di bais ta haya nan confronta hopi biaha cu cacho.

Den un colaboracion strategico, Dog Control Unit, Bureau City Inspector, KPA y Post Aruba ta lansa un campaña pa sigui conscientisa nos comunidad di nan responsabilidad di mantene nan cacho den nan cura of na looplijn manera cu Ley di Cacho ta stipula.

Dialuna 11 di april nos lo cuminsa parti post cards di advertencia na e casnan cu nos identifica cu nan cacho ta pafo di cura.

Na su turno, Bureau City Inspector lo sigui cu su parti di e proceso pa controla y bishita e casnan aki pa evalua e situacion. Den caso cu e situacion no cambia na dicho adres despues di a ricibi un of mas advertencia, esaki lo por conduci finalmente na un multa.

Ban evita un multa indesea y ban evita cu no solamente nos empleadonan ta haya nan den enfrentamento cu cacho riba caminda, pero pa e seguridad di un y tur y tambe e pa bienestar di e mesun cacho nan.