Seleccion Girls U15 di Aruba ta cla pa bataya dos dia contra di Seleccion U17 di Corsow.

Durante e conferencia di Prensa dialuna na e Tecnical Center Angel Botta na Noord, Women's Coordinator di AVB, Dyanne Wiersma y entrenador di e seleccion Girls U15, Milly Henriquez a elabora riba e dos weganan di fogeo cu e seleccion Girls U15 tini e dianan 9 y 10 di Juli contra di nos isla ruman Corsow cu lo ta presente cu un seleccion U17. Mirando e compromiso cu Aruba lo tini e fin di luna aki den e torneo di Concacaf na Tampa, Florida a opta pa hunga dos wega di fogeo prome cu e seleccion sali pa e torneo maximo den Caribe. Aña pasa, Aruba su seleccion femenino U14 a bira campeon den e torneo di CFU pero e biaha aki nos damitanan lo bay hunga den un torneo di nivel mas halto esta Concacaf.

Nos seleccion tin un aña ta entrena den e Academia di AVB y a hunga ultimo den e campeonato di mucha homber. Esaki sin duda tabata un bon experiencia pa nos seleccion U15 cu ta den pleno desaroyo. No obstante di esaki, e seleccion a demostra un disciplina enorme, hopi motiva y ta determina pa hasi un bon papel atrobe e aña aki. Un esfuerzo cu a bini di tur banda tanto di nan mayornan, y e staf di coaches cu tur dia ta yuda na e progreso di nos hobennan. Coach Henriquez sigur ta satisfecho mirando cu un trabou duro a wordo hasi durante un temporada largo.

Ta bon pa bisa aserca cu e fondo recauda den e dos weganan contra Corsow ta pa nos damitanan den futuro sercano por bishita e institucion di futbol moderno na Tampa, Florida unda mucha muhernan ta combina e deporte di futbol cu nan estudio cu a deseo di bira un futbolista femenino profesional. Nos hungador por bay di pasantia algun siman y hasi diferente try-out na dicho institucion.

Pa loke ta e wega contra Corsow. Tanto diasabra como diadomingo nos seleccion lo midi forza. Diasabra e wega lo ta 8or di anochi mientras diadomingo e lo ta 3or di atardi. Ambos wega lo ta den stadion Guillermo Trinidad na Dakota.

Un y tur ta keda invita pa bin mira nos muchanan den accion.

Mira e flyer pa mas informacion. #297sports