Sport Vereniging Dakota y RCA lo bira e clash di futbol e fin di siman aki.

E prome lugar contra di dos lugar di nos campeonato actual di futbol lo ta e fin di siman aki ora cu e dos rivalnan eterno esta RCA y Dakota topa otro den stadion Guillermo Trinidad na Dakota.

Esaki lo bira wega number 17 y ambos ekipo ya caba ta mustra di ta den e playoff final di AVB. Dakota ta comanda e tabla di posicion cu 42 punto dos mas cu RCA cu tin 40 punto. Dakota tin e mihor promedio di gol cu ta +4. Dakota a gana 14 wega y RCA 12 wega. RCA ta empata 4 biaha y Dakota 0 biaha. Dakota ta perde 2 wega mientras RCA ta keto bay invicto e campeonato aki.

Den e prome rond, dia 12 di December, RCA ta gana Dakota cu e score minimo di 1 - 0. Tanto RCA y Dakota tin machine di gol e campeonato aki. E hoben delantero, John Silva di RCA ta goleador di e campeonato cu 23 gol sigui pa e dos goleadornan di Dakota su tras cu ta Sebastian Montoya cu 19 gol y Ricky Hodge cu 17 gol.

Mirando e continuacion di e temporada di futbol 2021 - 2022 di AVB, Dakota y RCA sin duda ta e dos ekiponan faborito pa logra e titulo maximo di nos futbol. RCA e aña aki ya caba a prolonga e Copa Betico Croes 2022. Ta bon pa bisa aserca cu e ekipo cu termina na di prome lugar lo bira e campeon di e campeonato regular unda tin un premio efectivo di AVB mara na esaki.

Un yamada na e fanaticada grandi di tur dos ekipo pa asisti diadomingo awor pa 6or di atardi ora cu Dakota y RCA topa otro den e clash di nos futbol local.

Exito na Dakota y RCA #297sports Info source: Futbol Aruba Facebook Page