Tur cos ta cla pa Flip Flop Festival awenochi

Awenochi ta tuma luga e di dies edicion di Flip Flop. E Diferente artistanan a yega Aruba y diabierna atardi tabata tin un reuda di prensa. Durante e rueda di prensa cada artista a conta un tiki di kiko Aruba por spera awenochi. E moderadornan Mark Benson Denz y Laura Molina a comparti e ultimo detayenan. Portanan lo habri pa 6 or di atardi y e evento lo caba pa 3'or di marduga. Lo tin un entrada separa pa e area di mesa y uno pa area general combina cu 'standing vip'. Lo tin hopi bar y tambe diferente truck di cuminda. E organisadornan ta contento cu miles di hende a cambia nan ticket pa banchi caba. Esaki lo sigi awenochi na porta pa esnan cu no a logra cambia nan banchi. Ta premira cu lo tin mas cu 7000 persona awenochi. Beéle , Mr Vegas y Yung Bredda no tabata por ta presente na e rueda di prensa, pero si por a tende di BB Bad, Rafik y Blaka Dan.

Esaki ta prome bes cu DJ internacional Bianca “BB Bad” Dijkhoffz ta bin Aruba y ta participa den e Flip Flop Festival 2025. El a indica di ta entusiasma y ta cla pa trece energia, trece e vibra Caribense. E lo ta tocando cantica mixto di Caribe y ta bay tin un tremendo show pa tur presente. El a invita tur hende pa yega n’e evento di Flip Flop pa mira kico tur ta tuma luga.

Wrenroy “Blaka Dan” Ogiste, cantante, a conta di bay presenta den Flip Flop lo ta un experencia unico. E ta haya cu Aruba ta como su di dos cas. E ta bay haci un bon show durante Flip Flop. E ta en espera pa por tin su presentacion cu Tsunami.

E ta invita tur hende pa yega y disfruta di e bon musica y vibra.Rafik Al-Hariri, cantante, a conta cu esaki ta su prome evento di Flip Flop y ta un honor pa ta na Aruba. Diasabra ta bay pasa bon y e ta kere cu e miho show cu e lo duna ta na Aruba.

E ta bay canta rond di dies cantica y trinta minuut di show. Hunto cu ne riba stage tin su bailadonan y musico. El a invita tur hende cu ta scucha su musica pa yega y pasa un rato agradabel. Tambe pa tur yega trempan, pasobra ta bay tin sorpresa.

Jessica de Veer, Tropical Bottling Company, a indica cu e di dies edicion di Flip Flop a kibra record. El a expresa di ta emociona pa por t’ey un biaha mas cu e Flip Flop Festival. Tambe e ta haya cu esaki ta e miho edicion ainda.

Ta un orguyo pa mira cu nan ta haya respaldo, e apoyo di tur hende. Nan a traha lunanan largo pa e evento aki y awo falta poco pa e festival tuma luga.

E bon reaccion, e sosten cu nan ta ricibiendo no ta solamente di Aruba, pero tambe di Boneiro y otro pais. De Veer a invita tur hende yega trempan, pa busca e ultimo ticketnan. Tur cos ta cuminsa trempan, unda cu tur cos ta bay ta super bon. Tambe el a recorda un y tur pa bebe consciente.A resta solamente algun ticket pa e area general obtenibel na Citgo Boulevard y Citgo Essoville.