Vera-elise Bakmeyer a core su prome evento den atletismo na e Weganan Hubenil na Rosario, Argentina.

Participa den un evento grandi manera ta e caso na Weganan Suramericano Hubenil no ta nada facil. Kizas e nerviosismo por hunga un rol, cual ta comprendibel pa un atleta den desaroyo cu no tin un experencia cu weganan grandi manera e Suramericano Hubenil. Una bez den e careda esaki lo bira otro ya cu e adrenalina ta subi y tur atleta kier presta y duna lo maximo di nan mes.

Den e caso di Vera-elise riba e 1500m, e la core contra un elenco di bon coredornan di Peru, Chile, Ecuador, Brasil y Argentina. E clima awe diahuebs tabata bon unda e solo a sali skerpi. Mester bisa cu den e prome dos bueltanan di e careda Vera-elise tabata hopi serca hunto cu e otro coredornan den un pace faborabel. Pero den e ultimo rond a hasi un diferencia unda Vera-elise a sak un tiki atras. E atleta Vera-elise Bakmeyer ta marca un tempo final di 5.13.47. Dos siman atras, Vera-elise a registra un tempo di 5.07(record nacional) na e Carifta Games na Jamaica. Manera Vera-elise mes a bisa cu e experencia tabata unico, e la spera un tiki mas di su mes. Awor e lo evalua y ahusta hunto cu coach Dabian pa asina core mas mihor den un proximo oportunidad.

E careda y medaya di Oro a ser gana pa e atleta di Ecuador, Alder Caisalitin cu a core un tempo di 4.33.34. Diasabra awor Vera-elise lo core su di dos evento cual ta e 800m pa 2.30 ora di Rosario.

Hopi exito Vera-elise. #297sports