Gabinete AVP-FUTURO a ranca sali dunando alivio na pensionadonan.

ORANJESTAD (5 maart 2025 ) E Gobierno nobo aki a ranca sali apenas 1 luna pasa y

ta trese alivio na defensa pa nos pensionadonan.

Echo ta cu si di berdad gobierno anterior tabata tin e intencion pa duna bek na

pensionadonan, dicon esaki no a refleha bek den e presupuesto 2025 cu gobierno

anterior mes a propone? Ta precisamente e tipo di politica sin vision aki, a forsa pueblo,

y particularmente esnan mas vulnerabel, pa confronta un dilema inhumano di

desesperacion na momento cu nan mester scoge paga sea pa nan remedi of pa

sobrevivi e resto di luna te ora nan bolbe cobra.

E cortamento sin piedad di 60 miyon florin cu e gobierno anterior a impone riba salud di

e aseguradonan di AZV, ta keda graba den memoria di pueblo. E medida aki a inclui

recorte den salario di profesionalnan di salud, y a pone hopi remedi for di e lista positivo

cu AZV no a cubri.

Echo ta cu Gobierno AVP-Futuro por medio di un nota di cambio a trese e cambio real

pa duna bek e alivio na pensionadonan cu 250 florin na reparatietoeslag pa mehora nan

poder di compra. “ Ahinda falta mas pa yuda nos pensionadonan pa mehora nan poder

di compra, pero esaki ta sigur un bon comienso. Esaki no ta un gesto simbolico, esaki

ta un acto di husticia, un reparacion moral pa daño causa. Esaki ta un gobernacion cu

curason, determina, y cu e pueblo como punto di salida pa cada decision” asina

parlamentario John Hart a indica.