Parlamentario Dangui Oduber: Periodo di stage pa minister Cicilia a pasa!

Periodo di stage pa minister Cicilia a pasa!

Grado di occupacion di hotelnan ta sigui baha! Tur luna di anja 2025 grado di occupacion a baha.

E situacion di nos turismo no ta bayendo bon. Nos ta constata cu grado di occupacion di hotelnan ta bahando, revpar no ta aumentando y tourism credits ta cayendo. Un indicacion cu turismo tin su retonan e anja aki. Tur luna e grado di occupacion a baha y pa luna di augustus 2025 e grado di occupacion a baha cu 9% den comparacion cu augustus 2024. Na augutus 2025 e grado di occupcion tawata 74%. Es mas esaki ta e grado di occupacion di mas abou pa hotelnan despues di pandemia.

E proyeccionan di AHATA pa grado di ocupacion tambe a wordo husta y ta mustra cu di dos mitad di anja e occupacion lo ta mas abou di loke incialmente a wordo proyecta.

Loke ta preocupa nos mas ta e hecho cu minister di turismo Cicilia no tin vision, no tin maneho y no tin un plan di accion pa atende cu e retonan den e sector.

Nos ta mira cu e enfoke di minister Cicilia ta den cantidad y no Calidad. Mientras cifranan di cantidad ta subi, grado di occupacion ta baha y tourism credits ta baha. Mientras minister Cicilia ta papia di un crecemento balansa den turismo, AAA NV ta papia di un crecemento record y esaki ta bastante confuso y contradictorio. E ta un crecemento balansa of e ta un crecemento desproporcional??

Nos ta mira crecemento explosivo for di e mercado latino americano y ta puntra nos mes si e turistanan aki ta laga mesun hopi placa atras cu e turista americano. Nos ta puntra nos mes si e turistanan aki ta hospedando na hotelnan.

Na momento cu grado di occupacion y tourism credits ta baha ta un senjal serio pa e sector hotelero. Si esaki continua lo mira medidanan contra empleadonan cu lo mester cuminsa reduci oranan di trabou y consequentemente economia di Aruba tambe lo sintie.

Nos no ta sinti ningun urgencia di gobierno pa regula e sector di vacation rentals. Como ex minister di turismo nos a laga atras un ley completamente cla pa regula e sector di vacation rentals pa crea un level playing field y percura pa pais Aruba haya su fair share di e entradanan.

Mas cu 6 luna a pasa y ainda e gobierno negligente aki no a atende cu e ley aki. Ta parce cu esaki NO ta un prioridad pa nan y nan no ta considera regulacion di vacation rentals como algo urgente.

Mientrastanto casnan ta impagabel na Aruba, tur dia casnan ta wordo bendi cu estranheronan, no tin tereno mas pa nos mes hendenan y huur tambe ta impagabel.

E problema di Vivienda aki ta uno serio cu mester wordo atendi cune mas pronro cu ta posibel. Na e momentonan aki ta casi imposibel pa un yui di tera yega na su cas paso sea no tin tereno of e prijs di casnan ta impagabel.

Nos ta expresa nos preocupacion serio con minister Ciclia ta atendiendo cu e situacion aki. Ta carece seriedad y sigur no tin liderazgo na e momentonan aki.

Turismo ta algo serio, nos tur riba e pais aki ta depende di dje y no tin tempo pa corre stage mas awor aki, ta momento di accion, decision y ta momento pa lidera! Henter e pais aki ta depende di turismo. E periodo di 3 luna stage a pasa, awor ta ora pa mira accion!