Parlamentario John Hart ta pidi actualisacion di caso A.C. Lanoy

ORANJESTAD (8 di juni 2025) – Presidente di comision di husticia den Parlamento,

Parlamentario John Hart, a haci un peticion formal na Minister di Husticia, mr. drs.

Arthur Dowers, pa tuma parti den un vragenuur oficial tocante e caso di A.C. Lanoy. E

vragenuur aki lo tuma luga diaranson awo, 12 di juni 2025, den sala di Parlamento di

Aruba.

Manera por corda, na februari ultimo, Parlamento di Aruba a urgi gobierno durante un

reunion publico pa instrui e departamento hudicial encarga cu e ehecucion di e

investigacion den e caso di A.C. Lanoy, pa brinda transparencia activa na e famia di

A.C. Lanoy y na comunidad di Aruba.

Segun Parlamentario Hart, e importancia pa keda tene e gobierno skerpi den

asuntonan manera esaki ta vital, y ta pa es motibo ey, cu den e prome siman di su

funcion como parlamentario, e ta pidi un vragenuur specifico riba e caso.

Den e sesion, Parlamentario Hart ta pidi Minister Dowers pa duna un actualisacion

general riba e estado di investigacion y e pasonan cu Ministerio di Husticia lo tuma

aden, sin perhudica e integridad di e investigacion mes.

Tambe ta pidi informacion adicional tocante e status di proyectonan pa Cuerpo Policial

Aruba, manera bodycam, dash cam, test di droga y otro herment operativo cu ta

importante pa restaura y consolida e confianza publico den nos sistema di husticia.

Cu e iniciativa aki, Parlamentario Hart ta busca pa fortalece e liña di informacion y

transparencia cu e pueblo di Aruba ta exigi y tin derecho riba dje den un caso cu a lanta

hopi preocupacion y cuestionamento den comunidad.

Pueblo mester sa kico ta tuma luga, mientras cu ta esencial pa Parlamento cumpli su

rol di vigilancia y defensa di e interes publico.