Partido AVP: Parlamentario Sonaly Fernandez Acosta ta continua cu su lucha for di Ministerio di Asunto Social

ORANJESTAD (Mei 2025) - Despues di cinco luna intensivo y di aprendisahe  como miembro activo di Parlamento di Aruba, Sra. Sonaly Fernandez Acosta ta anuncia di ta tuma un paso nobo como parti di su compromiso na e comunidad di Aruba. Pa prome di juni 2025, Sonaly lo sigui eherce su trabao como consehero strategico di Minister di Asuntonan Social den Gabinete AVP/FUTURO.

"Tabata sigur un gran honor di por a representa pueblo di Aruba como miembro di Parlamento. E experencia aki a duna mi hopi claridad riba e proceso parlamentario y e necesidadnan di nos comunidad. Tambe a pone mi refleha unda mi por contribui di un manera mas fuerte cu e pasion y experencia cu mi tin,” segun Sra. Fernandez Acosta.

E transicion aki ta un decision personal basa riba Sonaly su motivacion principal pa drenta e arena politico. E mision, particularmente ta enfoca riba e sector di social, entre otro, sosten pa e gruponan di mas vulnerabel den nos sociedad. Den e encargo nobo, Sonaly lo por traha mas cerca y ehecuta cambionan cu tin impacto profundo riba nos comunidad.

"Mi mision semper tabata pa trece cambio positivo unda e ta mas necesario. For di e encargo nobo aki, mi ta sinti cu mi por yega mas cerca di e realidad di nos comunidad y purba duna forma na solucion concreto" segun Sra. Fernandez Acosta.

Sra. Fernandez Acosta ta gradici su coleganan den Parlamento y tur su votadonan cu a dun’e  nan sosten y confiansa. Sonaly lo sigui entrega su mes pa un Aruba mas husto y inclusivo cu e mesun pasion y dedicacion cu semper el a bin ta haci.